logo

Þegar barn hafnar foreldri án raunverulegrar ástæðu

Lykilorð

25. apríl er alþjóðlegur dagur vitundarvakningar um foreldraútilokun. Foreldraútilokun á sér stað þegar barn hafnar foreldri sem það átti áður gott samband við vegna neikvæðra áhrifa hins foreldrisins. Mikilvægt er að gera þarf greinarmun foreldraútilokun annars vegar og þegar barn verður fráhverft foreldri sínu vegna raunverulegs ofbeldis, vanrækslu eða misnotkunar foreldris hins vegar.

Foreldraútilokun á sér yfirleitt stað í kjölfar skilnaðar foreldra þar sem viðhorfum barnsins er stýrt og það fær svart/hvíta sýn á útilokaða foreldrið sem það sér að mestu í neikvæðu ljósi. Með foreldraútilokun er barninu – án raunverulegrar ástæðu – innrætt sú trú/skoðun að útilokaða foreldrið sé hættulegt og óverðugt. Þetta er ekki aðeins skaðlegt vegna þess tengslarofs og missis sem barnið verður fyrir, heldur einnig vegna þess skaða sem innrætingin hefur á sjálfsmynd barnsins.

Raunveruleg dæmi

Í tilefni af þessum degi birtir Foreldrajafnrétti raunveruleg dæmi á YouTube og Facebook um þær ástæður sem börn gefa fyrir því að hafna foreldri sem það áður átti gott samband við. Hvert dæmi er skoðað út frá vísindalega viðurkenndum greiningartólum sem gefa vísbendingar um hvort barn er beitt foreldraútilokun eða ekki.

Greiningartólin sem vitnað er í eru: 8 merki um foreldraútilokun í barni og 17 útilokunaraðferðir foreldris. Á heimasíðu Foreldrajafnréttis og á YouTube síðu hvers myndbands má skoða dæmin út frá þessum greiningartólum.

Miklar rannsóknir hafa átt sér stað á foreldrútilokun síðustu ár og yfir eitt þúsund ritrýndar fræðigreinar hafa verið birtar síðustu áratugi um þetta alvarlega ofbeldi. Sýnt hefur verið fram á hvernig foreldraútilokun fellur undir skilgreiningar um ofbeldi í nánum samböndum og einnig hefur verið bent á áberandi líkindi með foreldraútilokun og innrætingu í sértrúarsöfnuðum. Rannsóknir hafa leitt í ljós að þessi tegund ofbeldis er ekki bundin við kyn og mynstrin erfast gjarnan á milli kynslóða. Afleiðingarnar eru alvarlegar og langvarandi fyrir þolendur, bæði börn og útilokaða foreldra, ömmur og afa.

„Þekking á foreldraútilokun er því miður mjög lítil hér á landi enn sem komið er og umræðan er oft fordómafull og kynbundin. Eina leiðin til að bæta úr þessu er að hvetja til umræðu sem byggir á staðreyndum og vísindalegum grunni,“ segir Brjánn Jónsson, formaður Foreldrajafnréttis.

Foreldrajafnrétti hvetur fagaðila og þá sem koma að foreldraútilokunarmálum til þess að uppfæra þekkingu sína og sækja sér sérfræðiþekkingu í foreldraútilokun. Börn eiga rétt á vernd gegn ofbeldi og röng greining er þeim afar skaðleg, bæði andlega og líkamlega og afleiðingarnar geta lifað með þeim út lífið.

Stjórn Foreldrajafnréttis
stjorn@foreldrajafnretti.is

Höfundarréttur:
Foreldrajafnrétti
Útgáfudagur:
Apríl
2023
APA
Stjórn Foreldrajafnréttis. (2023, April 25). Þegar barn hafnar foreldri án raunverulegrar ástæðu. Foredrajafnrétti. https://foreldrajafnretti.is/greinar/thegar-barn-hafnar-foreldri-an-raunverulegrar-astaedu/
MLA
Stjórn Foreldrajafnréttis. “Þegar barn hafnar foreldri án raunverulegrar ástæðu.” Foredrajafnrétti, 25 Apr. 2023, https://foreldrajafnretti.is/greinar/thegar-barn-hafnar-foreldri-an-raunverulegrar-astaedu/.

Deila grein

Facebook
Twitter
LinkedIn
Email